TVB三大人氣王蕭正楠、曹永廉、馬國明，平時拍劇就睇得多，但三個齊齊踩上舞台開演唱會？冇聽錯，呢件事真係發生咗！佢哋破天荒組成「型男大叔」組合，搞咗個《超時空型男》世界巡迴演唱會。6月13日禮拜六晚，終於殺到洛杉磯近郊Yaamava’ Resort Casino豪華劇院，美國嘅粉絲等咗咁耐，終於有得親眼見證！
講起呢個組合，真係未開場先好笑。三個人用自己個姓氏諧音，改咗個朵叫「燒馬槽」（蕭、馬、曹）——聽到個名都知唔會正經得去邊。事實上，佢哋之前為咗宣傳演唱會，拍咗條「結拜」片，輪流發毒誓保證唔甩底：曹永廉話甩底就便秘十日，點知蕭正楠秒速踢爆：「你向來都便秘㗎喎！」焗住阿廉加碼到廿日。蕭正楠自己話甩底就「開車冇油」，點知又俾阿廉反擊：「你兩架車都係電動車！」。輪到馬國明，佢好認真咁話「踢波入唔到波」，蕭正楠再補一刀：「你唔係守門員咩？」——三個大男人你窒我、我窒你，成個過程九唔搭八，但就笑到人哋收唔到聲。
呢種「棟篤笑式互串」，正正係佢哋嘅最大賣點。三個相識多年嘅好兄弟，台上台下都係咁玩得，火花絕對唔係夾出嚟，而係真友情嘅自然流露。蕭正楠仲成日笑言，邀請馬國明加入唔係因為佢唱得，而係「佢喺隔籬聽住，唔好意思唔請」——呢啲說話，擺明係老友先敢講！
當然，演唱會唔止得個笑字。佢哋會又唱又跳多首大家耳熟能詳嘅TVB經典劇集主題曲，包括《巨輪》、《On Call 36小時》、《衝上雲霄》等等，絕對係劇迷嘅集體回憶。馬國明仲預告過，呢次係佢嘅「處男騷」，會考慮「露肉」——不過佢嘅定義係「露出臉上肌肉」，笑言唔會戴面具。呢種意想不到嘅答案，正正係佢嘅招牌天然呆喜感。
图源：官宣，版权属原作者
【购票入口】
唔好諗住剩係嚟聽歌，你係嚟睇一場集金曲、笑料、兄弟互串於一身嘅娛樂盛宴。洛杉磯呢場係美國首站，機會難逢，錯過唔知要等到幾時。撲飛趁早，到時一齊入場笑番晚！
